Liwat nga nagapanawagan ang grupo sang nurses sa gobyerno nga dulaon ang overseas deployment ban nga ginpatuman sang Philippine Overseas Employment Administration (POEA) sa nurses kag iban pa nga health workers abroad.
Ang ban ang ginpatuman sang POEA matapos nalab-ot sang ahensya ang 5,000 annual cap sang Hunyo 1.
Sa interview sang Bombo Radyo kay alyas ‘Jane’, isa ka myembro sang PrisoNurse, grupo sang mga nurse nga indi makatrabaho sa luwas sang pungsod bangud sa deployment ban, iya ginpahayag nga kinamatarong nila nga magpangita sang oportunidad abroad bangud tuman ka nubo ang sweldo sa pungsod kag kulang man ang apresasyon nga ginahatag sa ila sang gobyerno sa tunga sang risgo nga ila ginaatubang sa trabaho.
Indi man patas suno sa iya ang annual cap sang deployment sang mga medical professional overseas.
Nahibaluan nga sang nagligad nga semana, ginpasakaan sang Inter-Agency Task Force (IATF) ang annual cap sa 6,500.
Suno kay Jane, nagpasalig ang POEA nga 99 percent sang 1,500 additional slots ang ihatag sa ila nga mga nurse para sa deployment abroad apang indi man ini bastante suno sa iya bangud kalabanan sa ila ang wala na nakaabot sa pagkuha sang slot.
Pahayag ni Jane madamo na sa ila ang nagserbisyo sa health system sang pungsod sa idalom sang “no-work, no-pay” employment scheme.
Nagakadapat suno sa iya nga indi pagbutangan sang upang ang ila handom nga masulhay nga kabuhi nga indi mahatag sang gobyerno sang Pilipinas.
Matandaan nga una na nag-apelar ang Filipino Nurses United (FNU) sa Duterte Administration nga maghire sang kapin 42,000 nga nurses ukon dugang nga nurses sa kada barangay kag 6,000 nurses sa government health care facilities agud mas mapabaskog ang public health care system sang pungsod.
