ILOILO CITY – Nagakinahanglan nga sundon ang ginaresita nga bulong sang doktor kag likawan ang self medication.
Ini ang panugyan sang pharmacist kag Academic Supervisor for Pharmacy sa College of Health and Allied Medical Professions sang University of San Agustin nga si Dr. Remi Charlene Salvilla.
Sa interview sang Bombo Radyo kay Dr. Salvilla, iya ginpahayag nga sila nga mga Pharmacist ang makabig nga ‘safeguards of drugs’.
Kabahin sa ila katungdanan amo nga magiyahan ang mga pasyante sa bulong nga dapat nila tumaron santo sa resita sang doktor kag ang pagpahangop kun ano ang nagakaigo nga dosage sang bulong.
Sa malawig na nga tion, ginpahayag ni Dr. Salvilla nga bugal para sa ila nga mga pharmacist kaupod ang mga pharmacy student sang University of San Agustin nga makabulig sa mas madamu nga tawo nga nagakinahanglan sang medical attention paagi sa Bombo Medico.
Sa palaabuton nga Bombo Medico sa Hulyo 14 sa Iloilo Science and Technology University (ISATU), sila nga mga Pharmacist ang magabulig sa pagkuha sang vital signs sang mga pasyente kag sila man ang natuon sa pagpanghatag sang mga bulong.
Yari naman ang pagpahayag sang commitment sang College of Health and Allied Medical Professions sang University of San Agustin sa Bombo Medico 2019.
