ILOILO CITY – Kinahanglan may physicial examination bag-o mahatagan sang assistive device ang pasyente.
Sa patigayunon nga Bombo Medico 2019 sa Hulyo 14 sa Iloilo Science and Technology University (ISATU), magabulig ang grupo sang mga Physical Therapist sa screening sa mga pasyente nga nagakadapat hatagan sang wheelchair, walker, baston kag sungkod.
Sa interview sang Bombo Radyo kay Michael Vincent Cayanan, isa ka physical therapist, iya ginpahayag nga sila nga mga Physicial Therapist ang kasubong sa mga medical doctors apang may yara sila sang kinalain sa patag sang pagbulong sa mga pasyente kasubong sang mga may stroke, Parkinson’s disease, cerebral palsy, may mga bali ukon may yara sang deperensya sa posture sang tul-an sa lawas.
Sa pagpaathag ni Cayanan, ang mga medical doctor ang nagagamit sang bulong apang sila nga mga physical therapist ang nagapamulong paagi sa therapy.
Bilang isa ka physical therapist, importante suno kay Cayanan nga ila saulo ang anatomy sa lawas sang tawo agud nga mahibalu-an kun ano nga sahi sang therapy kag kun ano nga sahi sang assistive device ang igahatag sa mga pasyente.
Sa patigayunon nga Bombo Medico, ginpahayag ni Cayanan nga sila nga mga physicial therapist ang magabulig sa screening kun ano ka taas ukon ano nga sahi sang assistive device ang kinahanglan sang pasyente.
Para sa mga nagakinahanglan sang sungkod ukon crutches, kinahanglan suno sa natungdan nga nagasanto ang kataason sang pasyente sa sungkod agud nga indi na magtuga pa sang dugang nga injury.
Yari ang pagpahayag ni Cayanan sang commitment sang ila grupo sa pagpakigbahin sa Bombo Medico 2019.
