Ginpamatukan sang grupo sang mga sugar producers ang mandu ni Presidente Ferdinand ‘Bongbong’ Marcos Jr. sa Department of Agriculture nga padasigon ang importasyon sang 64,050 metric tons sang refined sugar.
Base sa memorandum order nga ginpirmahan ni Agriculture Senior Undersecretary Domingo Panganiban sang Disyembre 20, ginpahayag nga nagakahangawa si Marcos (nga amo subong ang head sang ahensya) mataas nga inflation rate sa sugar.
Gin-cite sini ang consumer price index nga gin-release sang Disyembre 6 nga nagapakita sang annual inflation increase para sa sugars, confectionery, kag desserts nga nakalab-ot sa 38% sang bulan sang November.
Sa amo nga order, ginmandu ang gilayon nga pagtipon sang Minimum Access Volume Advisory Council kag ginmanduan man ang ahensya nga maghimo na sang lihok agud nga ma-stabilize ang presyo sang kalamay.
Ang Minimum Access Volume amo ang quantity sang specific nga agricultural commodity nga mahimo ma-import nga may manubo nga taripa.
Kasunod sini, nag-apelar naman ang United Sugar Producers’ Federation of the Philippines sa presidente nga i-postpone ang importasyon samtang yara sa peak sang sugar milling sa pungsod.
Suno sa grupo sang sugar producers, kun yara gani sa peak sang harvest, bastante ang suplay sang raw kag refined sugar kag wala sang nakit-an nga pagkinahanglan sang importasyon.
Mas makapalain sa local sugar farmers suno sa grupo kun iduso gid sang gobyerno ang sugar importation.
Nagpanugyan pa ang grupo nga hulaton anay sang gobyerno nga mapaguwa na ang resulta sang post-assessment sang sugar stocks pagkatapos sang milling season.
Antes sini nga isyu, nangin mainit na nga topiko sang nagliligad nga mga binulan ang sugar importation ang Pilipinas, kag kun matandaan, nagdangat pa sa pag-convene sang Kongreso sang hearings kag mag-rekomendar sa pag-file sang panumbungon batok sa mga opisyal nga gina-alegar involved sa amo nga kontrobersyal nga isyu. ##
