Gin-ako sang Government Service Insurance System (GSIS) nga nag-invest ini sa online gambling platform nga DigiPlus Interactive Corp. apang wala ini sang ginsapubliko nga kantidad kun pila.
Kasunod ini sang ginbulgar ni Senate Deputy Minority Leader Risa Hontiveros nga nag-invest ang GSIS sang masobra sa P1 billion sa gaming giant nga DigiPlus.
Sa tunga sang pagpakamalaot halin sa publiko, nagsabat naman ang GSIS nga maga-kooperar ini sa oversight institutions kag sa regulatory bodies kaangot sa ginhimo sini nga investment.
Ginpasalig man sini nga suportahan ang transparency kag accountability sa tanan nila nga investment activities.
Sa ila nga statement, ginsulit man nga wala-punaw ang ila commitment nga mag-akto santo sa pinakamaayo nga interest sang mga myembro kag pensioners.
“We welcome the scrutiny and call for public disclosure from various sectors, and we are prepared to present all relevant documents and data to the appropriate authorities. As stewards of public trust, we affirm our unwavering commitment to act in the best interests of our members and pensioners,” suno sa GSIS.
Gindugang man nga ginasunod lang nila ang ila mandato nga protektahan kag padakuon ang kontribusyon sang mga trabahador sang gobyerno.
Lakip man sa ginpasalig sang GSIS amo ang padayon nga pag-conduct sang comprehensive review sa charter, investment policies, risk exposure thresholds, kag sectoral guidelines ilabi na ang naga-involve sang sensitive ukon high-risk industries.
As of June 2025, ang GSIS ang may total assets nga P1.88 trillion kag naka-record sang Net Operating Income nga P76.82 billion.
Matandaan nga una na ginkwestyon ni Hontiveros kun ano ang tuyo sang GSIS sa pag-invest sa gambling platform.
“In the first place, what was GSIS thinking, investing funds in online gambling? Eh tayo nga po, mga kasamang nagtatrabaho sa gobyerno, ni hindi pwedeng tumungtong sa casino lalo na hindi pwedeng magsugal doon,” suno sa senadora. “Kaya bakit ang GSIS, todo taya, at ginawang puhunan ang pera ng public employees sa sugalan?” #
