ILOILO CITY — Ginakabig sang Iloilo City General Services Office (GSO) nga dako nga bulig ang pagtupa sang ulan sang naglinigad nga inadlaw sa Iloilo City.
Sa interview sang Bombo Radyo kay Engr. Niel Ravena, head sang nasambit nga talatapan, iya ginpahayag nga bangud sa ulan, nabuligan nga mabunyagan ang mga tanum sa syudad nga pila na ka bulan naga-eksperyensya sang tig-ilinit.
Suno kay Ravena, lain gid kun makatilaw ang mga tanum sang tubig-ulan bangud sa natural na, makahatag pa sang nutrisyon nga madugay na nga wala mabunyag bangud man sa El Niño.
Ginpahayag man sini nga ang pag-ulan sa syudad ang isa man ka kahigayunan agud i-monitor sang talatapan ang mga groundwater kun nagdugang na ukon wala.
Kun magapadayon ang pag-ulan, plano nga sekyaron sang GSO ang mga bubon sa syudad agud matumod kun may pagbag-o sa lebel sang groundwater nga posible man makabulig sa water supply sa syudad.
Apang indi pa masiling sang natungdan nga nagbalik na sa normal ang water ground level bangud sa ulan.
Nahibaluan nga yara sa 203,000 liters nga tubig ang nahatag subong nga adlaw, Mayo 24 sa mga residente sang syudad.
