Ginalantaw sang General Services Office (GSO) nga dako nga bulig sa pagbuhin sang minilyon nga production cost para sa waste management sang Iloilo City ang pagsaylo sang waste to energy nga proyekto humalin sa Calajunan Sanitary Landfill.
Sa interview sang Bombo Radyo kay Engr. Niel Ravena, head sang Iloilo City General Services Office, iya ginpahayag nga sadto, naggasto sila sa pag-maintain sang soil cover sa balor nga P15 million kada tuig.
Kon magsugod naman ang Waste to Energy project sa bag-o nga sanitary landfill sa 2026, ang basura nga ma-dispose ang ipahamtang sa waste to energy machine kag ang city government ang mabayad sang production cost nga P1.70 tubtob P1.80 per kilo sang basura.
Suno kay Ravena, ang energy nga ma-produce halin sa basura ang ibaligya sa Private Public Partnership (PPP) partners sang syudad ilabi na sa mga nagakinahanglan sang kuryente.
Nahibaluan nga ang 10-year operational period sang landfill sa Calajunan, Mandurriao nga nagbukas sang 2016 ang makalab-ot na sa iya operational period sa 2026, kag kinahanglan na nga i-shut down santo sa regulasyon sang Department of Environment and Natural Resources (DENR).
Magluwas sa Iloilo City, nagabubo man sang basura sa Calajunan, Mandurriao ang mga banwa sa Iloilo nga ginalakipan sang Oton, San Miguel, kag Pavia.
Kada adlaw, nagadangat sa 400 ka tonelada sang basura ang matipon sang syudad, kag ang bag-o nga facility ang ginalauman nga makapahagan-hagan sini.
Sa subong, ginaproseso na sang Iloilo City Government ang nagakaigo nga permit para sa bag-o nga facility.
Samtang ang Environmental Compliance Certificate (ECC) ang gina-review na sa central office sang DENR.
Sa tion nga maaprubahan, umpisahan na ang 18 ka bulan nga construction sang facility.
