Gin-athag sang General Services Office (GSO) nga ginhimo nga ‘urgent’ ang pag-aproba sang 10-year Solid Waste Management Plan agud nga indi mabudlayan ang syudad kon hinali nga magsirado ang sanitary land fill sang Iloilo City.
Ini kasunod kon matapos ang 10-year life span sang Sanitary Landfill sa Calajunan, Mandurriao sa 2026.
Sa interview sang Bombo Radyo kay Engineer Niel Ravena, Head sang General Services Office (GSO), iya ginpahayag nga kon magsirado ang landfill, wala na sang iban nga pahamtangan sang mga basura ang syudad.
Suno kay Ravena, kon mahuman ang bag-o nga landfill, magalab-ot sa 400 tons per day ang basura nga mahimo ma-generate sang planta sa Iloilo City.
Gin-athag man sini nga madamo pa sang mga rekisitos nga ipasa sang ila talatapan antes maaprubahan kon sa diin, may yara sila sang 18 ka bulan antes makumpleto ang bag-o nga sanitary landfill.
Lakip na diri ang safe closure plan sang sanitary landfill, construction sang drainage system, kag soil cover agud matabonan ang existing landfill.
Ipahamtang naman ang bag-o nga landfill sa Brgy. Ingore, La Paz nga may Material Recovery Facility (MRF) agud nga maseparar ang mga madunot, indi madunot, kag recyclable nga basura.
Ang Integrated Solid Saste Management Plant ang may sarang man nga makahimo sang supply sang kuryente kag maka-cover sang basura halin sa Pavia, Oton, kag San Miguel.
