Ginklaro sang General Services Office (GSO) nga indi iya sang Iloilo City Government ang mga portalet nga naga-require sang bayad sa tion sang Dinagyang Festival.
Sa interview sang Bombo Radyo kay Engr. Niel Ravena, head sang nasambit nga opisina, iya ginpahayag nga wala sang bayad ang tanan nga mga ginapanag-iyahan nga portalet sang siyudad.
Suno kay Ravena, ang mga naglapata nga laragway sang amo nga portalet ang yara nahamtang sa Iloilo City Center ukon Gaisano ICC kun sa diin napanag-iyahan ini sang pribado nga organisasyon kag indi sang siyudad.
Madumduman nga may mga kahiwatan man nga natabo sa nasambit nga lugar kaangay sang concert nga possible diri ini gingamit.
Wala man sang ideya si Ravena kun paano ini gin-regulate sa tion sang Dinagyang Festival.
Matapos nga naglapta ang mga laragway, gilayon man nga ginpamutangan sang GSO ang ila 80 ka mga portalets sang signage nga nagasiling nga libre ang pagamit sang mga ini.
