Liwat nga ginpatuman sang Iloilo City General Services Office (GSO) ang massive cleanup drive sa mga kabarangayan agud maprotektahan ang residente sa makamamatay nga dengue virus.
Sa interview sang Bombo Radyo kay Engineer Niel Ravena, head sang General Services Office, iya ginpahayag nga nagsugod ang pagpanglimpyo sang nagligad nga semana kon sa diin, ginapapasa sila sang report sang Department of Health (DOH).
Suno kay Ravena, ginapabalik sang talatapan ang ila nga street sweepers agud mabuligan ang barangay nga nagapatuman sang cleanup drive.
Ginpahayag man sini nga nagkooperar man ang mga residente sa tikang kasunod sang pagpaguwa man sang order sang city government.
Nagpanugyan man ini sa publiko nga himuon ang 5S kontra Dengue – Search and Destroy breeding sites, self-protective measures, seek early consultation, support fogging, kag sustain hydration.
