Magapatindog sang tatlo ka Material Recovery Facility (MRF) ang syudad sang Iloilo sa tatlo ka mga merkado agud nga may yara sang storage ang neighboring barangay sang ila nga residual waste ukon basura.
Sa exclusive interview sang Bombo Radyo kay Engr. Neil Ravena, assistant department head sang General Services Office (GSO) sang Iloilo City Government, iya ginpahayag nga isa sa dako nga concern sang mga barangay sang syudad, amo ang kakulang sa MRF kun sa diin gina-segregate ang mga basura.
Suno kay Ravena, sa 180 ka barangay sa syudad, 60 lamang diri ang may yara sang MRF bangud madamo sang barangay ang tuman ka populated sa diin halos wala sang available nga lugar nga mahimo patindugan sang pasilidad kun sa diin nila mahimo tipunon ang ila nga basura.
Bangud sini, ginatinguhaan nila nga mapangitaan sang junk shop ang pila ka mga barangay nga wala sang butangan sang ila residual waste.
Magluwas diri, may material recovery facility na nga ginapatindog ang syudad sa Iloilo Central Market, Iloilo Terminal Market ukon Super kag sa Jaro Big Market agud maka-cater sang basura sang tagsa ka neighboring barangay.
Nagapanawagan man ang natungdan sa kada barangay sang syudad nga i-separar ang residual waste sa organic waste ukon basura nga recyclable sa basura nga non-recyclable agud malikawan ang baho sa palibot.
