𝗜𝗟𝗢𝗜𝗟𝗢 𝗖𝗜𝗧𝗬 — Nagpanugyan sa publiko ang General Services Office (GSO) nga obserbahan ang proper waste disposal agud nga malikawan ang pagbaha bangud sa basura.
Sa interview sang Bombo Radyo kay Engr. Niel Ravena, head sang General Services Office, iya ginpahayag nga nagapatuman ang ila talatapan sang special trip agud nga kolektahon ang mga goma nga posible pugaran sang mga lamok kag tugahan sang dengue virus.
Suno kay Ravena, kinahanglan nga indi pagsupton ang mga wala na ginagamit nga goma bangud ginasudlan ini sang tubig kag nangin breeding ground sang lamok, ilabi na subong nga tig-ululan.
Ginpahayag man sini nga kuntani mabilin sa kabarangayan ang mga compostable waste kag ibutang na lang sa material recovery facility (MRF) agud ang mangin obilgasyon sang syudad ang magatutok na lang sa residual kag special waste.
Gin-ako man sang natungdan nga nangin dako sa ila nga pagpaghangkat ang solid waste nga makolekta kaangay na lamang sang mga shell sang talaba kag mga sofa nga guba.
Nagpaandam man ang talatapan sa residente nga indi maghaboy sang mga basura sa creek bangud posible ini mangin rason sang pagbaha.
