ILOILO CITY – Nakapaathag na sa Commission on Audit ang General Services Office kun nga-a wala sang Material Recovery Facility ang kadam-an sang mga barangay sa syudad sang Iloilo.
Ini ang kasunod sang ginpaguwa nga report sang Commission on Audit may kaangtanan sa pagtuman sa Republic Act 9003 ukon Ecological Solid Waste Management Act.
Sa interview sang Bombo Radyo kay Engr. NEIL Ravena, pinuno sang General Services Office, iya ginpahayag nga nauntat lang ang inventory sang Material Recovery Facility bangud sa COVID-19 pandemic.
Suno kay Ravena, wala sang Material Recovery Facility ang mga barangay sa syudad bangud sa kakulang sang lote nga pahamtangan sini.
Sa pagkamatuod suno kay Ravena, may yara na sang grant gikan sa Department of Environment and Natural Resources Office-Environmental Management Bureau nga magpahamtang sang tatlo ka Material Recovery Facility kun sa diin duha diri ang ipahamtang sa City Proper kag isa naman sa Jaro.
Ang tagsa ka Material Recovery Facility ang nagabalor sang P600,000 kag mahimo nga makahaboy ang 30 ka mga barangay.
Bangud nga wala nadayon, ginpanugyan sang ahensya nga mas makapaayo nga magpirma na lang anay sang Memorandum of Understanding sa mga lisensyado nga scrap buyers para sa Material Recovery System.
Kadungan sini, ginpahayag ni Ravena nga wala ginapanugyan sa subong ang waste segregation bangud sa kahangawa nga dala sang COVID-19 pandemic.
Mahimo nga mabutang sa risgo ang ikaayong lawas sang mga basurero ilabi na kun ang basura ang ginalakipan sang mask ukon gingamit nga tissue.
Mas makapaayo nga sa balay pa lang, ginasunod na ang waste segregation agud nga mas mahapos na lang ang pag-dispose sini.
