ILOILO CITY- Ginakabig sang punong barangay sang Tanza- Esperanza, City Proper nga isa ka maayo nga oportunidad nga magpangalagad sa isigkapareho ang pagdonar sang dugo.
Sa interview sang Bombo Radyo kay Punong Brgy Wilbur Orada, iya ginpahayag nga nangin kabahin na sang iya lifestyle ang pagbulig sa isigkatawo paagi sa blood donation.
Suno sa iya gamay nga butang lang ang paghatag sang malip-ot nga tiempo para sa pagdonar sang dugo apang ang dugo nga iya madonar ang dako nga butang para mapalawig ang kabuhi sang mga nagakinahanglan.
Ginpahayag ni Orada nga magluwas sa mga pumuluyo sa iya barangay kag iban nga opisyal sang Tanza-Esperanza, magapakigbahin man ang iya grupo nga Guardians Brotherhood Inc.-Libra Chapter.
Dugang pa ni Orada, tuman ka hamili sang dugo gani makabig nga hamili man ini nga regalo para sa iban nga tawo.
Ang Dugong Bombo 2019 patigayunon sa Sabado, Nobyembre 16,2019, sa Iloilo Science and Technology University sa Burgos St. ,Lapaz, Iloilo City.
