Ginpa-Bombo sang pila ka mga driver ang dako nga perwisyo nga ila na-eksperyensyahan sa guba kag naga-bawud nga dalan sa idalom sang Ungka Flyover sa Ungka II, Pavia.
Sa interview sang Bombo Radyo kay Edwin Baclas, isa ka jeepney driver nga naga-agi sa lugar, iya ginpahayag nga dako gid nga problema ang amo nga kahimtangan sang dalan bangud masami naga-umpok-umpok ang mga salakyan nga naga-agi sa amo nga lugar.
Suno pa sa iya nga kun mag-ulan, nagatinir ang tubig sa mga buho sang dalan, nga nagadugang pa gid sa kabudlayan sang ila paglabay sa nasambit nga dalan.
Ginpahayag man niya nga madugay na ang nasambit nga sitwasyon, apang wala pa sila nakakita sang mga tikang sang opisyales para makay-o ini.
Bangud sini, nagatuga ini sang mabug-at nga trapiko, kag napilitan ang mga salakyan nga maghinay-hinay sa lubak-lubak nga dalan kun sa diin delikado ilabi na sa mga motorsiklo kag salakyan.
Nagahingyo ang mga apektado nga motorista nga mahatagan kuntani sang solusyon sang mga barangay officials agud mapakay-o gilayon ang amo nga dalan.
Dugang pa sini bangud ini isa ka national road, mas nagadamo ang naga-agi nga mga salakyan kag tawo, rason nga kinahanglan ini hatagan sang atensyon antes pa ini magresulta sa madamo nga aksidente.
