Ginpa-Bombo sang isa ka residente sang Barangay Tanza, City Proper ang ila covered gym bangud sa delikado nga sitwasyon sini.
Sa interview sang Bombo Radyo kay Hilary Tamon, isa ka concerned citizen iya ginpahayag nga tuman na ka gabok ang roofing sang covered gym kag may posibilidad nga maguba ini ilabi na kon magkusog ang ulan ukon hangin.
Ginpahayag man sini nga wala sang nagakaigo nga sabat ukon solusyon halin sa Local Government Unit (LGU) bisan pa nga ginpahibalo na nila ang nasambit nga problema.
Suno pa kay Tamon ginahimo nga lugar sang mga kabataan ang covered gym agud venue sang ila aktibidad sa barangay.
Bangud sini, ginakabalak-an sang mga residente ang posible nga aksidente nga matabo kon indi ini mahatagan sang solusyon gilayon ang problema.
Nagapanawagan man si Tamon kay Mayor Raisa Treñas nga kuntani paagi sa ila pagdangop sa Bombo mabtian sang alkalde ang ila hibubun-ot bangud seguridad sang mga tawo sa ila barangay ang nakataya sa nasambit nga problema.
Dugang pa ni Tamon, kuntani mahatagan gilayon sang atensyon ang problema antes pa man may matabo nga disgrasya.
Nagpangayo na sang bulig ang mga opisyal sang Barangay Tanza, City Proper sa opisina ni Cong. Jam Jam Baronda sang nagligad nga Oktubre bangud sa delikado nga kahimtangan sang atup sang covered gym sa ila lugar.
Sa interview sang Bombo Radyo kay Kagawad Rowena Arsenio, iya ginpahayag nga
ginaproseso na sa subong ang mga papeles may kaangtanan sa nasambit nga concern.
Ang nasambit nga covered gym kabahin pa sang proyekto sang una ni Mayor Jed Mabilog kun sa diin iya man ginpahayag nga ginagamit man ini bilang evacuation center kon may kalamidad.
