MANILA – Hugot nga ginpanginwala sang ginbansagan nga “drug queen” nga isa ka punong barangay ang alegasyon may kaangtanan sa iligal nga droga nga iya ginakuha sa mga kapulisan nga korap.
Suno kay Barangay 484 punong barangay Guia Gomez Castro, wala siya sang ihibalo kun sa diin nakuha ang mga impormasyon nga gina-angot sa iya.
Pahayag pa niya, apisar nga depensahan niya ang iya kaugalingon, indi man siya sa gihapon pagpatihan sang mga tawo nga wala man nakakilala sa iya.
Kun ang paghipos ang kabaylo sang safety sang iya pamilya, mas pilion na lang niya nga maghipos.
Indi na prayoridad sang punong barangay ang panumdumon sang iban batuk sa iya.
Dugang pa sang natungdan, lain na ang sistema sa subong sa diin wala na sang kahigayunan nga idepensa pa ang kaugalingon gani gilayon na lang nga ginatiro ang tawo apisar nga wala man sang ebidensya.
Nahibaluan nga ginkumpirma sang Bureau of Immigration nga nagpadulong sa Estados Unidos si Castro bangud wala man ini sang pending nga warrant of arrest.
Padayon naman nga nagapanindugan si Philippine Drug Enforcement Agency Director General Aaron Aquino nga si Castro ang nagabakal sang mga ginkumpiska nga iligal nga droga sang mga narco cops kag ginabaligya naman sa liwat.
Ginmanduan ni Aquino ang punong barangay nga magbalik sa Pilipinas kag atubangon ang tanan nga ginahimo niya.
