Nagdungka na sa syudad sang Iloilo ang pinaka-ulihi nga guided missile frigate sang Philippine Navy, ang BRP Miguel Malvar (FFG-06), bilang kabahin sang Operational Readiness and Capability Test (ORACT) antes ini isalang sa full operational deployment.
Sa interview sang Bombo Radyo kay Commodore Joselito De Guzman, Commander sang Naval Forces Central, iya ginpahayag nga katuyuan Operational Readiness and Capability Test ang masiguro nga ang barko kag ang crew may kapasidad sa pag-patrol kag pagprotekta sa kadagatan nga akop sang Pilipinas.
Ginpangunahan ni De Guzman kag ni Captain Paul Hechanova ang commanding officer sang BRP Miguel Malvar kag tumandok sang Passi City, Iloilo.
Suno kay De Guzman, ang masunod nga destination pagkatapos sang Iloilo amo ang Cebu.
Pahayag pa sang opisyal nga kun madinalag-on ang mga patigayunon nga test, possible nga magpadayon pa ini sa Northern Mindanao para sa dugang nga deployment exercises.
Ang BRP Miguel Malvar isa ka simbolo sang padayon nga modernisasyon sang Philippine Navy kag sang determinasyon sang Pilipinas nga protektahan ang teritoryo sini sa kadagatan.
