ILOILO CITY- Ginahulat pa sang Department of Education(DEPED) Region 6 ang guidelines naggikan sa Central Office may kaangtanan sang pagpahanugot sang face to face graduation rites sa mga lugar nga napaidalom sa alert level 1 kag 2 status.
Sa interview sang Bombo Radyo kay Mr. Hernani Escullar Jr., spokesperson sang DEPED -6, iya ginpahayag nga positibo ini nga development sa mga stakeholders sa sektor sang edukasyon ilabi na sa mga estudyante.
Apang suno kay Escullar, may yara sa gihapon sang ipatuman nga mga protocol kaangay sang pag-limit sang numero sang mga tawo nga mahimo makasulod sa venue sang graduation kag iban pa nga pagsulundan agud malikawan ang paglatnanay sang COVID-19.
Nahibaluan nga ang graduation rites subong nga school year ang natalana sa Hunyo 27 tubtob Hulyo 2.
