GUIMARAS – Liwat nga hugton sang probinsya sang Guimaras ang border control sa tunga sang nagasaka nga kaso sang COVID-19 sa Western Visayas.
Sa interview sang Bombo Radyo kay Guimaras Gov. Samuel Gumarin, iya ginpahayag nga sa idalom sang gin-isyu niya nga executive order no. 63 series of 2020 nga mangin epektibo bwas, Agosto 10, ang Jordan Wharf, Buenavista Wharf kag RoRo Wharf sa Jordan amo lang ang entry points padulong sa probinsya.
Ang Sebaste Wharf sa Sibunag ang limitado lamang sa delivery sang local produce samtang ang Puyo Wharf naman sa Nueva Valencia kag Tacay Wharf sa Buenavista ang gamiton para sa delivery sang mga construction materials apang kinahanglan nga may yara ini sang pahanugot gikan sa gobernador.
Suno kay Gov. Gumarin, ang mga residente nga naghalin sa Guimaras humalin sang Agosto 1, 2020 kag wala sang sintomas sang COVID-19 ang mahimo nga makasulod sa probinsya apang kinahanglan nga magpa-idalom sa mandatory quarantine.
Samtang ang mga Guimarasnon nga wala nakapauli sa probinsya antes ang Agosto 1, 2020, ang iga-subject sa 14 day mandatory quarantine magluwas lang kun may ipakita ini nga resulta sa RT-PCR test nga negatibo sa COVID-19.
Ang mga pumpboat kag RoRo vessels nga may byahe Guimaras-Iloilo vice versa ang maga-umpisa 4:00am-7:00pm.
Samtang ang mga establisimento ang magabukas 6:00am-6:00pm kag ang mga pampubliko nga salakyan ang maka-umpisa sa pagbyahe 4:00am tubtob 8:00pm.
