Nanguna ang probinsya sang Guimaras sa mga probinsya sa Western Visayas sa pagsurrender sang mga loose firearms sa idalom sang Project RTT 3389 nga ginlunsar sang Police Regional Office 6 ukon PRO-6.
Suno kay Police Brigadier General Randulf Tuaño, Regional Director sang PRO-6, 100% ang Guimaras sa pag-comply sa Restrict, Track and Turn-in ukon Project RTT 3389.
Iya ginpahayag nga sa 98 ka barangay sa probinsya, may 101 ka loose firearms nga boluntaryo nga ginsurrender.
Ginalakipan ini sang 84 ka short firearms kag 17 ka long firearms.
Suno kay Tuaño ang madinalag-on nga implementasyon sang programa indi lamang resulta sang pagpaninguha sang kapulisan, kundi bangud man sa aktibo nga kooperasyon kag suporta sang mga lideres sa komunidad.
Gindayaw man ni Police Brigadier General Randulf Tuaño ang provincial government, local chief executives, kag mga barangay officials sa Guimaras nga nagbulig sa implementasyon sang programa.
