Guimaras, nagpatigayon man sang clean up drive sa mga kabaranggayan

NUEVA VALENCIA, GUIMARAS – Naghiwat man sang ‘drive up clean up’ ang mga barangay sa Nueva Valencia, Guimaras.

Ini bangud sa padayon nga nagataas nga numero sang kaso sang dengue hemorrhagic fever sa probinsya.

Sa interview sang Bombo Radyo kay Loren Gallarda sang Municipal Disaster Risk Reduction and Management Office, iya ginpahayag nga nagdangat sa 198 ka kaso sang dengue ang na rekord sa Buenavista; 180 sa Jordan; 119 sa Nueva Valencia; 115 sa Sibunag kag 95 naman ka kaso sa San Lorenzo.

Suno kay Gallarda, hugot nga ginakampanya sa probinsya sang Guimaras ang 4S ukon ‘ “Search and Destroy” , “Secure Self Protection” , “Seek Early Consultation” kag “Say Yes to Fogging/misting”.

Dugang pa sang natungdan, ginapatigayon sang mga kabaranggayan ang 4o’clock habit sa pagpaninlo sang tagsa ka mga ugsaran agud nga matapna ang pagduging sang mga lamok.

Samtang may yara naman sang ambulansya nga nagalibot sa San Lorenzo, Guimaras sa diin nakapaskil ang tarpauline nga may mga tinaga nga ‘likawan ang dengue magpaninlo kita tanan’.