Nagpatigayon sang pagsinapol ang motorbanca operators kag Maritime Industry Authority (MARINA) Region 6 may kaangtanan sa problema sang kakulang sang motorbanca nga nagabyahe Iloilo City-Guimaras and vice-versa.
Sa interview sang Bombo Radyo kay Engr. Fernando Enalpe, Chairman sang Jordan Motorbanca Cooperative, iya ginpahayag nga lakip sa ila nahisugtan sa nasambit nga pagsinapol amo ang pagplastar sang sistema sang mga modernized motorbanca.
Suno kay Enalpe, bangud sa problema nga dala sang kakulang sang mga nagabyahe sang motorbanca, pila na ka mga plano ang ila ginplastar agud nga masolusyunan ang problema.
Dugang pa sang natungdan, magahatag man sang P3 million nga bulig ang Guimaras Provincial Government sa mga naapektuhan nga mga operator kag crew sa mga sakayang pandagat.
Nahibaluan nga ginbasura sang MARINA ang hingyo sang Guimaras Provincial Government nga palawigon ang gahom sang certificate of public convenience sa mga sakayang pandagat nga nag expire na sang Disyembre 31.
Ini ang santo man sa mando ni MARINA Administrator Retired Vice Admiral Robert Empedrad sa diin nagapati ang opisyal nga masarangan sa mga bag-o nga motorbanca nga mapasakay ang linibo nga mga pasahero nga nagapakadto pabalik sa Iloilo kag Guimaras.
