GUIMARAS – Ginahulat na lang sang probinsya sang Guimaras ang sabat sang Maritime Industry Authority ukon MARINA nga dugangan ang seating capacity sa mga nagabyahe nga modernized motorbanca.
Halin sa 50% nga seating capacity, nag-apelar ang Guimaras Provincial Government nga pasakaon ini sa 75% agud nga mas madamo nga pasahero ang mapasakay kag malikawan ang tuman ka lawig nga mga pila sa pantalan.
Sa interview sang Bombo Radyo kay Guimaras Vice Governor Atty. John Edward Gando, iya ginpahayag nga Enero 3 sang ginpasa niya ang request kay MARINA Region VI Director Engr. Jose Venancio Vero apang nagpahayag man si Vero nga lantawon pa niya ang sitwasyon sang nagabyahe nga fiber glass boats agud indi man malapas ang protocols batok sa COVID-19 partikular na ang physical distancing.
Sa subong suno kay Gando, wala pa sang update sa ila nga request.
Ini nga hingyo ang may tuyo nga mabuhinan ang mahal nga plete sa modernized vessel kag mabuhinan ang huol para sa mga pasahero.
