GUIMARAS – Handum sang Guimarasnon athlete nga makakuha sang medalya sa mga international sporting event kasubong sang Olympics.
Sa Good Morning Philippines program, ginpakigbahin ni Joida Gagnao sang Old Poblacion, Buenavista, Guimaras, ang iya gin-agyan nga training antes nakuha sang silver medal sa 3,000 meter steeplechase kag bronze medal sa 5000 meter run sa Southeast Asian Games.
Suno kay Gagnao, 10 pa lang siya ka tuig sang nag-umpisa ang iya huyog sa dalagan nga impluwensya sang iya magulang.
Ginpahayag ni Gagnao nga humalin sang emelentary tubtub high school, nagpasakop siya sa mga sporting event nga nangin liyabe agud nga mangin scholar sang Far Eastern University.
Bilang pangayaw sa Metro Manila, wala nangin mahapos ang iya gin-agyan kag kinahanglan niya nga balansehon ang sports kag ang pagtuon tubtub nga nahatagan sang kahigayunan nga itiglawas ang Pilipinas sa Southeast Asian Games.
Ang gin-agyan nga pagsakripisyo ang ginhimu ni Gagnao nga inspirasyon agud nga makakuha sang medalya sa prestihiyoso nga sporting event.
Sa subong, plano sang 4th year Education Student-Athlete nga magpakigbahin sa mga international running event apang wala pa sang pinal nga petsa kun san-o ini patigayunon.
