NUEVA VALENCIA, GUIMARAS – Handum sang isa ka Guimarasnon Boxer nga bronze madalist sa Palarong Pambansa 2019 nga makahatag sang dungog sa Pilipinas kasubong ni 8-Division World Champion Sen. Manny Pacquiao.
Sa exclusive interview sang Bombo Radyo kay Rodel Ortiz sang Poblacion, Nueva Valencia, Guimaras, Grade 8 student sang Nueva Valencia National High School, iya ginpahayag nga ini ang iya labing una niya nga pagpakigbahin sa Palarong Pambansa sa diin nakuha niya ang bronze medal.
Bag-o pa man nangin boksidor, ginpahayag ni Ortiz nga mahilig na siya sa basketball, sepak takraw, volleyball kag iban pa nga sahi sang sports kag nahagadansiya sang iya abyan nga magsulod sa patag sang boksing.
Bisan pa nga nailo sa amay, ginpahayag sang natungdan nga wala gid nagadula ang pagsuporta sang iya pamilya sa iya.
Bisan ang iya manghod suno kay Ortiz ang may planu man nga mangin isa ka atleta nga magatiglawas sang Western Visayas sa patag sang sports.
Sa ginpatigayon nga Palarong Pambansa 2019 sa Davao City, ginpahayag ni Ortiz nga indi man nangin mahapos ang iya gin-agyan bangud nga mga maayo ang iya nangin kasumpong gikan sa nagkalain-lain nga rehiyon sa pungsod.
Bangud nga mangin 18 anyos na siya sa maabot nga Setyembre, ginpahayag ni Ortiz nga indi na siya mahimo nga makapakigbahin sa masunod nga Palarong Pambansa apang indi ini upang agud nga iya ipadayon ang handum nga mangin isa ka kilala nga boksidor sa pungsod.
Bronze Medalist Palarong Pambansa 2019
