Naga-kooperar sa kapulisan ang ginakabig nga person of interest sa likod sang kamatayon sang isa ka 41-anyos nga lalaki sa Brgy. Bongol San Miguel, Guimbal, Iloilo.
Sang nagligad sang aga sang nasapwan ang lawas sang biktima sa talamnan sa kun sa diin may igo ini sang pagkatiro sa likod nga naglapos sa tuo nga portion sang iya nga tiyan.
Sa interview sang Bombo Radyo kay Police Corporal Karl Francis Boston, imbestigador sang Guimbal Municipal Police Station, iya ginpahayag nga nag-execute man sang affidavit ang person of interest nga magpaidalom ini sa paraffin test kag sa iban pa nga tests nga kinahanglan sang otoridad.
Sa pagpangusisa sang pulis, masabad ang biktima kag may record na sa pagpangawat nga na-settle lamang anay sa lebel sang barangay.
Ginpahayag man nga nakaagi man sini labo ang hose nga ginagamit sang person of interest sa ila nga patubigan.
Gina-establisar pa sang dugang kun ano gid ang motibo sa krimen.
