ILOILO CITY- Wala nadayon ang campaign rally sang BBM-SARA tandem sa Guimbal, Iloilo subong nga adlaw.
Ang nasambit kuntani nga rally ang gin-facilitate ni anay Iloilo 1st District Rep. Richard Garin nga district chairman sang Partido Lakas nga gina-endorso ang BBM-SARA tandem.
Ang rally sa tunga man sang kontrobersyal nga pagtabon sang pangalan sang Guimbal National High School kag gin-islan sang Guimbal Stadium kun sa diin hiwaton ang rally.
Sa interview sang Bombo Radyo kay Iloilo 1st District Rep. Janette Garin, iya ginpahayag nga mutual ang ila nangin desisyon sa tunga sang kampo sang BBM-SARA kag sang Partido Lakas nga pag-cancel sang rally bangud sa madamo nga isyu nga nagtuluhaw kun sa diin naumid ang mga tawo nga wala sang kahilabtanan ilabi na ang mga manunudlo sang eskwelahan.
Ginkumpirma man ni Garin ang impormasyon nga indi pagdayunon ang rally bangud may dis-infection sa eskwlehan sa subong nga adlaw apang wala sang ihibalo si Richard Garin tuhoy sa amo nga regular activity sang Guimbal nga nabutang sa ila calendar of activities.
Gin-athag man ni Garin nga isa ka private property kag indi iya sang Department of Education ang stadium nga venue sang rally.
Suno sa kongresista, gindonar ini sang Parents- Teachers Association para sa amo nga eskwelahan apang wala pa matapos ang pagproseso sini agud nga mangin propedad na sang DEPED kag ang nagabayad sang tax para sa amo nga duta ang isa ka private entity.
Kasunod naman sang kanselasyon sang rally, ginpahayag ni Garin nga may ginapreparahan sila nga mas dako nga campaign rally sa 1st district para sa BBM-SARA apang ini ang padayon pa nga ginahitso.
