ILOILO – Nakahanda na ang Commission on Elections sa pagbukas sang application para sa gun ban exemption sa nagahilapit nga 2023 Barangay and Sangguniang Kabataan Elections.
Sa interview sang Bombo Radyo kay Mr. Jonathan Sayno, Election Assistant II sang Iloilo City Commmission on Elections, iya ginpahayag nga temprano pa nga magabaton sang application ang ahensya agud mahatagan sang tyempo ang assessment.
Suno kay Sayno, bangud diri, buksan na ang application sang gun ban exemption sa Lunes, Hunyo 5 tubtob Nobyembre 15 nga nakasaad sa idalom sang Commission on Elections Resolution No. 10918.
Magalawig naman sang isa ka semana tubtub 15 ka adlaw antes maaprubahan ang mga application sa diin, magalawig naman ang election period tubtob sa Nobyembre 29.
Sa sini nga period, ginadumilian sang poll body ang pagdala sang armas.
Exempted naman sa gun ban ang presidente, bise presidente, senador, House of Representatives members, judges kag justices, Armed Forces of the Philippines senior commanders, Philippine National Police senior officials, Cabinet secretaries kag undersecretaries, ombudsman kag deputy ombudsmen, state prosecutors kag Commission on Elections officials.
