Naglab-ot na sa halos 70 ang naaresto nga gun ban violators sa Western Visayas pila ka adlaw bag-o ang eleksyon.
Sa interview sang Bombo Radyo kay PLt. Col Arnel Solis, spokesperson sang Police Regional Office-6, iya ginpahayag nga sa kabilugan nga 66 nga mga arestado, 27 ang narekord sa Iloilo Province, ginasundan sang Capiz nga may 16, Iloilo City nga may pito, Antique nga may anom, Aklan nga may apat, Guimaras nga may tatlo kag Regional Mobile Force battalion nga may tatlo.
Suno kay Solis, nagapadayon ang checkpoint sang otoridad sa bilog nga rehiyon kag nagpahanumdom sa gun owners nga indi magdala sang ila nga armas bangud bisan lisensyado ini apang kun wala sang dokumento sang ila nga application for exemption nga aprubado ng Comelec,arestuhon gihapon ang mga ini.
Pahayag niya, ang strikto nga implementasyon sang gun ban ang importante sa pagpasiguro sang malinong kag matawhay nga May 2025 national and local elections sa Lunes.
