Gin-anunsyo sang Philippine Coast Guard (PCG) nga butangan na sang gun system ang ila pinakadako nga mga barko nga ginagamit sa pagpatrolya sa West Philippine Sea.
Suno kay Commodore Jay Tarriela, Coast Guard spokesperson para sa WPS, ini nga system ang iga-install sa duha ka vessels sa ila hanay nga amo ang BRP Teresa Magbanua kag BRP Melchora Aquino.
Naka-schedule na suno sa iya ang pag-install sang 30-millimeter remote controlled stabilized naval gun system.
Matandaan nga nagbakal ang PCG sang lima pa gid ka 97-meter multi-role response vessels halin sa Japan, kag ang una nga barko halin sa sini nga batch ang natalana nga mag-abot sa 2027.
Ang mga barko sang PCG amo ang ginagamit agud nga mag-suplay sa naval outposts sa WPS lakip na sa BRP Sierra Madre sa Ayungin ukon sa Second Thomas Shoal.
Sang 2024, matandaan nga ang BRP Teresa Magbanua ang nagtinir sa Escoda ukon Sabina Shoal sa masobra lima ka bulan nga amo ang pinakamalawig nga pag-deploy sang PCG asset sa West Philippine Sea.
Ginpabalik lamang ini bangud sa kakulangan sa suplay kag pagbalabag na naman sang China sa resupply mission para sa amo nga barko. Magluwas diri, nakaangkon man ini sang damage bangud ginbungguan ini sang China Coast Guard (CCG).#
