ILOILO CITY- Nakit-an na nga daan sang mga otoridad ang 20-anyos nga gunman nga nagtuyo nga mag-assassinate kay former President Donald Trump antes pa man nagsugod ang rally sang Republican presidential nominee sa estado sang Pennsylvania.
Ang shooter amo si Thomas Matthew Crooks, 20-anyos, residente sang Bethel Park sa amo man nga estado nga sang ulihi napatay man sa kamot sang Secret Service agents.
Sa amo nga pagpang-atake isa ang patay kag duha ang napilasan bangud sa pagpangluthang kun sa diin naigo si Trump sa dulunggan.
Suno kay Bombo Rufino Gonzales, international correspondent sa Estados Unidos sang Amerika, natalupangdan na sang madamo nga tawo nga makaduluda ang hulag ni Crooks sa amo nga campaign event apang sang ginpangita na ini sang otoridad, wala na nila ini nakit-an kag natigayon nga makasaka ini sa atop kun sa diin siya nagplastar agud tiruhon si Trump.
Pahayag ni Gonzales, sa subong, nagapangita ang mga imbestigador sang mga clues sa kun ano ang posible nagtulod kay Crooks nga maghimo sang amo nga pagpang-atake.
Ginatun-an man sang Federal Bureau of Investigation kun isa ka potential act sang domestic terrorism ang natabo.
Sa bahin naman sang pamilya ni Crooks,ginpahayag sang FBI nga nagakooperar ang mga ini sa imbestigasyon.
Nagagwa naman sa background checking nga biktima sang bullying si Crooks sadto apang indi pa matul-id kun mahimo ini maangot sa iya ginhimo nga assassination attempt.
Nagtingob pwersa naman ang FBI. agents, analysts kag evidence technicians agud tutukan ang kaso kun sa diin tinguhaan nila nga ma-access ang cellphone sang gunman sa bulig sang court approval agud mahibaluan ang iya plano kag motibo.
