ILOILO – Nanari-sari nga kalibre sang armas-luthang ang nakuha sang otoridad gikan sa ginapahayag gunsmith sang New People’s Army sa Miagao, Iloilo.
Ang arestado amo si Joemarie Genosa Arro, 53 anyos sang Brgy. Aguiauan sa nasambit nga banwa.
Ang mga armas nga nakuha gikan kay Arro ang ginpresentar sa Police Regional Office 6.
Lakip sa mga nakuha amo ang mga masunod:
Isa (1) ka 12-guage shotgun
Lima (5) ka 12-guage shotgun barrels
Isa (1) ka semi-pistol sang wala wala pa matumod nga kalibre sang armas
Isa (1) ka improvised caliber .38 pistol nga may magazine
Lima (5) ka air guns
Pito (7) ka caliber .38 revolvers
12 ka nagkalain-lain nga magazine;
187 ka nagkalain-lain nga bala
Mga gamit sa pagkay-o sang armas
Sa interview sang Bombo Radyo kay PRO 6 Director Police Brigadier General Rene Pamuspusan, iya ginpahayag nga si Arro ang naangot sa rebelde nga grupo paagi sa pagserbe nga gunsmith ukon panday sang armas.
Suno kay Pamuspusan, madugay na nga ginpaidalom sa monitoring si Arro apang sang nagligad lang nga bulan nakumpirma ang iya kaangtanan sa rebelde nga grupo.
Si Arro ang yara sa kustodiya sang Miagao PNP kag natalana nga pasakaan sang nagakaigo nga kaso matapos ginserbehan sang search warrant sang joint elements sang Regional Intillegence Division 6 kag Miagao Municipal Police Station.
