ILOILO CITY–Nagapalamanog ang guya ni PO3 Federico Macaya Jr. matapos ang pagpanakit kag pagdupla sa iya ni 1st District Cong. Richard Garin.
Ini ang may kaangtanan sa natabo nga rambol sa tunga sang SK Kagawad kag anak ni SB Member Gil Gegato sang nagligad nga Disyembre 22 kadungan sang “Disyembre sa Guimbal”.
Sa exclusive interview sang Bombo Radyo kay Macaya, iya ginpahayag nga makapila siya ka beses nga ginsipa, gintindakan, gintampa, ginsiko,  kag ginduplaan ni Cong. Garin.
Suno kay Macaya, low morale ang tanan nga pulis sa Guimbal Municipal Police Station bangud sa pagbinastos kag pagpamahog sang mamalidha.
Ginpahayag dugang ni PO3 Macaya, ngA ginapamilit ni Garin nga siya ang nag-engganyo sa SK Kagawad nga indi na magpasaka sang kaso batok kay Gegato.
Sa pagkamatuod suno kay Macaya, ila nga ipaagi kuntani sa inquest proceeding ang pagpasaka sang kaso ugaling may natabo nga settlement sa tunga sang magtimbang nga bahin.
Nakibot na lang si Macaya sang siya ang ginpatawag ni Police Senior Inspector Antonio Monreal Jr. sa plaza sa diin didto na si Cong. Garin kag Guimbal Mayor Oscar Garin.
Pag-abot niya sa plaza, ginmandu ni Cong. Garin kay Monreal nga dis-armahan siya kag hinali lang nga gin-agawa sang mamalidha ang iya posas.
Sang ginposasan siya ni Cong. Garin, didto na nag-umpisa ang pagpanakit samtang nagapakitluoy siya.
Samtang ginaduro-duro siya sang mamalidha, nagataya naman si Mayor Garin sang pusil sa iya.
Nagapalangluya na si Macaya bangud sa pagsapote sa iya apang nabati-an pa niya nga nagpalupok sang makaisa ka beses si Cong. Garin.