Wala nadayon ang una nga ginpasalig sang COVID-19 Inter-Agency Task Force for the Management of Emerging Infectious Diseases (IATF) nga dulaon na ang quarantine classification sa syudad sang Iloilo.
Ini ang kasunod sang anunsyo sang IATF nga liwat nga palawigon ang Modified Enhanced Community Quarantine (MECQ) status sa syudad umpisa Septyembre 8 tubtob 30, 2021.
Sa interview sang Bombo Radyo kay Iloilo City Mayor Jerry Treñas, iya ginpahayag nga posible may mga gina-adjust pa ang national government angot sa mga ipatuman nga pagsulundan sa diin gina-umpisahan anay sa Luzon ang pagpatigayon sang granular lockdown sa mga area nga may pagtimbuok sang kaso sang COVID-19.
Suno sa alkalde, wala man sang problema kun MECQ sa gihapon ang classification sang syudad santo man sa nangin sentimyento sang mga negosyante ukon business sectors.
Apang ang hingyo lang sang nasambit nga sector, pahanugutan lang kuntani nga buksan ang mga establisyemyento kaangay sang personal care services, spa, kag barbershops nga wala gid nakarekober sang ginpatigayon ang asud-asud nga mga lockdown.
Pahayag ni Treñas, sa idalom sang MECQ, mahimo na nga mabuksan ang nasambit nga non-essential establishments PROVIDED nga naka-secure sang safety seal, fully vaccinated ang mga empleyado kag limitahan lang ang kapasidad umpisa sa 15 percent.
Natalana naman nga magpaggwa ang alkalde sang executive order angot sa mga adjustments sa pagpalawig sang MECQ status sa syudad.
