Duha ka gold medals ang dala-pauli sang Pinoy gymnast nga si Carlos Yulo halin sa Baku, Azerbaijan leg sang International Gymnastics Federation (FIG) Artistic Gymnastics World Cup Series.
Matapos nangibabaw sa parallel bars sang Sabado, ginpasagunsunan sini ang kadalag-an paagi sa pag-dominar sa vault kahapon, Domingo, Marso 12.
Naka-skor si Yulo sang 14.933 points sa iya duha ka vaults (15.033 points sa first vault kag 14.833 sa second vault). Nagpangaduha sa Pinoy Olympian si Harry Hepworth sang Great Britain nga may 14.816 points, samtang nagpangatlo naman si Shek Wai Hung nga may 14.716 points.
Nangin consistent ang maayo nga performance sang 23-anyos nga gymnast sa World Cup series subong nga tuig, apang sa Baku ang gina-konsiderar nga pinakamaayo ipaanggid sa una nga tatlo ka legs.
Kun balikan, nabulsa sini ang bronze medal sa parallel bars sa opening leg sa Cottbus, Germany. Sa Doha, Qatar, nakakuha ini sang gold sa floor exercise, silver sa parallel bars, kag bronze sa vault.
Sa kabug-usan nga World Cup Series, may yara siya sang tatlo ka gold medals, isa ka silver, kag duha ka bronzes.
Sunod nga balantayan amo ang katapusan nga leg sang series sa Cairo, Egypt nga matabo sa Abril 27 tubtub sa Abril 30. ##
