ILOILO CITY – Indi magnubo sa 20 ka personnel gikan sa H-IPC International Police Commission of Alpha Omega World Development Marshall Incorporated ang magadonar sang dugo sa Dugong Bombo 2019.
Sa interview sang Bombo Radyo kay Mr. Noel Rojo sang Office of the Supreme Commander, H-IPC International Police Commission of Alpha Omega World Development Marshall Incorporated, iya ginpahayag nga indi pa pinal ang listahan sang mga magapakigbahin sa Dugong Bombo.
Suno kay Rojo, ang pagsugpon sa kabuhi sang mga nagakinahanglan ang prayoridad sang ila grupo.
Sa pagkamatuod suno kay Rojo, sang gindeklarar ang Dengue outbreak sa pungsod, nagpatigayon sang blood-letting activity ang ila grupo apang indi man mahinago suno sa iya nga kulang sa gihapon ang supply sang dugo.
Paagi sa Dugong Bombo suno sa natungdan, makatipon sang dugang nga supply sang dugo ilabi pa nga madamu ang nagakinahanglan sang blood transfusion.
Nahibalu-an nga ang Dugong Bombo 2019 ang patigayunon sa Nobyembre 16 sa Iloilo Science and Technology sa Burgos St., La Paz, Iloilo City.
