ILOILO CITY- Ginkumpirmar sang pamilya sang babaye nga nasapwan nga patay kag puno sang pilas tuga sang pagkabuno sa sulod sang salakyan sa Inangayan, Sta. Barbara, Iloilo nga ginapanag-iyahan sang biktima ang habol kag comforter nga ginputos sa iya.
Ang biktima amo si Claire Diergos,36 anyos, residente sang Dagsaan, Buenavista, Guimaras apang nagaistar sa Deca Homes sa Pavia, Iloilo.
Matandaan nga nakit-an ang biktima nga naputos sa puti nga habol kag comforter sa sulod sang isa ka sports utility vehicle (SUV) nga pila na ka adlaw nga naka-park sa kilid sang dalan sa Barangay Inangayan, Sta. Barbara, Iloilo.
Ang nasambit nga SUV ang ginapanag-iyahan sang anak ni anay San Dionisio, Iloilo Mayor Peter Paul Lopez nga si Felix Paul kag ginbakal ni Diergos sa balor nga P850,000 apang indi pa fully- paid.
