Ginduso ang isa ka hagna sa Kamara agud matapna ang “troll farms” kag ang mga disinformation campaign.
Ang House Bill (HB) 11178 ukon Anti-Troll Farm and Election Disinformation Act ang gin-file sang mag-asawa nga sanday PBA party-list Rep. Margarita Nograles-Almario kag Davao Oriental 2nd District Rep. Cheeno Miguel Almario.
Suno sa mga mamalidha, tuyo sini nga hagna nga protektahan ang eleksyon sa Pilipinas paagi sa pagpasabat sa mga perpetrator.
Suno sa joint statement, indi lamang digital pranks ang trolls kundi “systematic tools” nga ginhungod agud nga mapatalang ang mga botante.
Lakip sa mga gintumod nga dapat dumilian amo ang operasyon sang troll farms, paghimo kag pagpalapta sang electoral disinformation, kag paghimbon para sa sini nga disinformation.
Sa idalom sang ginaduso nga hagna, ang magalapas sa pagsulundan ang mahimo mapreso sang anum tubtub dose ka tuig kag multahan sang halin sa P500,000 tubtub sa P10-million.
Ginsaad man sa HB 11178 nga iga-disqualify ang mga kandidato nga naga-benepisyo sa mga aktibidad sang troll farm. May salabton man pati ang online platforms nga ginagamit sa pagpalapta sang disinformation.
Ginasugo man ang Commission on Elections nga mag-trabaho kaupod sa Cybercrime Investigation and Coordinating Center, National Bureau of Investigation, kag sa Philippine National Police-Anti-Cybercrime Group agud nga ma-imbestigaran ang troll farms.
Dugang diri, tuyo man sini nga mapasangkad ang ihibalo sa social media paagi sa educational campaigns sang Department of Education, Commission on Higher Education, kag Department of Information and Communications Technology.
“The bill recognizes the critical role of insiders in bringing these clandestine operations to light and provides mechanisms to shield them from retaliation. Transparency is central to the measure, ensuring that investigations into troll farms are conducted fairly and without political bias,” suno pa sa authors sang hagna.
Nahibaluan nga sa guidelines sang Comelec, sa resolution nga ginpaguwa sang Septyembre 2024, nakasaad nga ang fake accounts, deepfakes kag “fake news” ang pagakabigon nga election offenses kag ginadumilian man ang visual disinformation.#
