MANILA – Ginabalay na sang mga senador ang hagna nga magahatag sang gahum kay Presidente Rodrigo Duterte agud nga mapadasig ang government transactions ilabi na subong nga may COVID-19 pandemic.
Ini matapos nga ginhingyo sang Presidente ang Kongreso nga amyendaran ang Ease of Doing Business Act agud malimitahan ukon madula na ang bureaucratic red tape.
Sa statement ni Senator Panfilo “Ping” Lacson, makabig nga practical kag expeditious ang pagpasar sang panibag-o nga layi nga makapadali sang government process samtang yara sa health emergency ang pungsod.
Suno kay Lacson nga isa sa mga author sang anti-red tape law, ang nasambit nga consensus ang natigayon paagi sa pagsinapol nga ginpanguhan ni Senate President Vicente “Tito” Sotto III.
Sa separado nga statement, ginpahayag ni Senator Miguel “Migz” Zubiri nga katuyu-an sang planned measure amo nga mahatagan sang “anti-red tape emergency powers” si Presidente Duterte.
Sa idalom sang Republic Act No. 11032 ukon Ease of Doing Business and Efficient Government Service Delivery Act of 2018, ang applications ukon requests ang kinahanglan nga matapos sa sulod sang tatlo ka adlaw para sa simple transactions kag kutub pito ka adlaw naman para sa complex transactions.
Ginapahanugutan ang longer period kun naangot na ang madamo nga government offices ukon highly technical processes.
Nahibalu-an nga ginpirmahan ni Presidente Duterte ang Bayanihan to Recover As One Act nga nagapahanugot sang additional powers may kaangtanan sa pandemic response kag recovery kag naglab-ot naman sa ₱165.5 billion ang gintalana para sa additional health spending kag bulig sa mga sektor nga lubos nga naapektuhan sang COVID-19 crisis.
Mataandaan nga nag-isyu man sang proclamation ang Presidente kun sa diin ginpalawig tubtub sa Setyembre 2021 ang national state of calamity bangud sa padayon nga nagataas nga coronavirus infections.
