ILOILO CITY – Liwat nga gin-file ni Alliance of Concerned Teachers (ACT) Rep. France Castro ang hagna nga naga-decriminalize sang libel.
Suno kay Castro, iya gin-file liwat ang House Bill 1769 sa kongreso kasunod sang affirmation sang Court of Appeals sang cyber libel conviction kay Maria Ressa nga isa ka Nobel Peace Prize laureate.
Ang affirmation sang guilty verdict batuk kay Ressa ang isa ka klaro nga example kun paano gamiton ang layi batuk sa media kag mangin sa isa ka ordinaryo nga pumuluyo kag pwersahon nga maghipos.
Suno pa sa iya, ang libel law sang pungsod ang nagaresulta sa prevalence sang sensitibo nga mga opisyal sang gobyerno kag public figures.
Ini ang nagaresulta sang pagpahipos sa media practitioners kag pagtago sang kamatuoran sa public knowledge kag pagdumili sa publiko nga makaintindi sang nagkalain-lain nga public issues.
Ang hagna ang una nga gin-file sang 14th Congress sang Bayan Muna Representatives sa pagpamuno ni anay Rep. Satur Ocampo, kag gin-file sang 15th tubtob 18th Congress.
