Iloilo City – Gin-refile ni Iloilo City Lone District Representative Julienne “Jamjam” Baronda ang House Bill 6817 ukon ang hagna nga nagatunga sa Iloilo City sa duha ka distrito.
Sa interview sang Bombo Radyo kay Baronda, iya ginpahayag nga pending subong ang hagna sa Committee on Local Government sa Kamara.
Suno kay Baronda, matapos gin-appoint si Committee chair Rex Gatchalian bilang secretary sang Department of Social Welfare and Development, na-untat ang committee meeting bangud nabakante ang chairmanship.
Ginpahayag ni Baronda nga sang damlag lang napilian si Negros Occidental 6th District Representative Mercedes Alvarez bilang bag-o nga chairperson sang Committee on Local Government sa Kamara.
Gani lauman suno sang natungdan nga maistoryahan ini sang labing madali nga panahon.
Sa tion nga matunga sa duha ka distrito ang Iloilo City, ang 1st district ang bug-usan sang Jaro, La Paz kag Mandurriao.
Samtang ang 2nd district ang bug-usan naman sang Lapuz, Molo, Arevalo, kag City Proper.
Nagakahulugan nga duha na ang mangin Representative sang Iloilo City sa Kamara.
May yara man sang reapportioning sa Sangguniang Panlungsod sa diin mangin 16 na ang mga konsehal.
Nakahulugan nga, may walo ka konsehal sa kada distrito, samtang isa gihapon ang Mayor.
