Iloilo City – Ginaabi-abi sang National Chairman kag Chief Executive Officer sang National Commission of Senior Citizens ang ginaduso nga Senate Bill No. 1573 para amyendaran ang Republic Act No. 7432 ukon Senior Citizens Act.
Sa amo nga bill, panubuon sa 56 halin sa 60 ang edad nga mahimo na nga makabig nga senior citizen.
Nahibaluan nga si Senator Ramon Bong Revilla, Jr. ang nag-file sang hagna nga nagatuyo nga ma-avail sang senior citizens ang mga benefits sang temprano.
Sa datos sang Department of Health sang Disyembre 2022, 7.33% sang COVID-19 cases sa mga Filipino senior citizens ang nagresulta sa kamatayon kun ipaangid sa 0.76% mortality sang mga naga-edad 18 tubtob 59.
Sa interview sang Bombo Radyo kay Atty Franklin Quijano, welcome development ini para sa iya, apang nagakinahanglan anay nga matun-an sang maid-id ang hagna antes ipasar.
Nahibaluan nga ang amo nga hagna ang pending sa committee halin sang Disyembre 6, 2022.
Samtang, ginpahayag naman ni Quijano nga aprubado na ang dugang nga P500 sa pension sang mga senior citizen nga mahimo mabaton kada bulan nga nasaad sa 2023 General Appropriations Act.
Ginpahayag sang natungdan nga ginahulat pa ang dugang nga P500 nagikan sa revenue collection sang gobyerno.
Gin-ako ni Quijano nga nagakinahanglan sang suporta ang grupo sang mga senior citizens agud marehistro ang tagsa nila ka mga pangalan sa database agud maisip ang kabug-usan nila nga populasyon sa pungsod.
Mahimo naman nga makuha ang registration form sa Office of the Senior Citizens Affair kag sa website sang National Commission of Senior Citizens nga www.ncsc.gov.ph.
As of today, may ara na sang 437,874 nga narehistro sa website.
