ILOILO CITY Ginatun-an sang pila ka senador ang pagpasar sang layi nga magtapna sa madata nga paglapta sang peke nga mga balita ukon fake news.
Ginpahayag ni Sen. Francis Pangilinan sa interview sang Bombo Radyo Iloilo nga dapat may layi nga ang mga peke nga balita ang kuhaon sa social media platform kaangay sang Facebook, sa sulod sang 24 oras, ukon pinahan ang mga ini.
Ang Facebook suno sa senador ang pinakadako nga nagapalapta sang fake news kag 97 percent sang mga Pinoy ang may Facebook account.
Dapat man pasangkaron suno kay Pangilinan ang Department of Information and Communications Technology (DICT) kaangay sang pagtukod sang anti-fake news ukon cybercrime unit nga amu ang mahimo magrekomendar sang kaso nga posible ipasaka sa mga responsable sa pagpalapta sang fake news.