Nagdangat sa P15.7 million ang halit nga natuga sang Bagyo Kristine sa fisheries sector sa Western Visayas.
Sa nasambit nga numero, P8 million ang halit sa Capiz, P3.6 million sa Negros Occidental, P1.6 million sa Iloilo, P1.6 million sa Antique, P687,000 sa Aklan kag P68,000 sa Guimaras.
Sa interview sang Bombo Radyo kay Remia Aparri, director sang Bureau of Fisheries and Aquatic Resources (BFAR) Region 6, iya ginpahayag nga lakip sa mga naapektuhan amo ang fishpond kag shellfish farm, mangin ang mga fishing boat kag fishing gear.
Suno kay Aparri, bangud sa bagyo, naapektuhan ang mga kasag, alimango, talaba, bangrus tilapia, lukon kag nagkalain-lain pa nga isda.
Magluwas sa mga naguba nga sakayang pandagat, may pila man nga mga naanod sang dalagko nga balod kag nag-angkon sang guba.
May mga sakayang pangdagat man nga nagakinahanglan sang overhaul bangud sa madugay nga paglalugdang sang ila makina sa tubig dagat.
Nagpasa naman sang damage report ang BFAR agud magpangayo sang pondo kag bulig para sa mga apektado nga manugpangisda sa rehiyon.
Ginpaintindi man ni Aparri ang importansya sang pagparehistro sang mga manugpangisda sa ila mga Municipal Agriculture Office, mangin ang pagparehistro sang ila mga sakayang pandagat agud malakip sa mga prayoridad nga makabaton sang ayuda sa tion nga maaprubahan ang ginapangayo nga pondo.
