Nagsaka na sa P1.69 billion ang balor sang halit sa sektor sang agrikultura sa Pilipinas bangud sa paglaslas ni Bagyo Kristine.
Suno sa data sang Department of Agriculture, ang apektado nga areas amo ang Cordillera Administrative Region, Ilocos Region, Central Luzon, Calabarzon, MIMAROPA, Bicol Region, Western kag Eastern Visayas, kag ang SOCCSKSARGEN.
Nagdangat na sa 42,346 farmers kag 37,590 hectares sang agricultural areas ang apektado kag naglab-ot ang volume sang production loss sa 108,266 metric tons (MT).
Sa sini nga halit, ang humayan amo gid ang natam-an nga may pierde nga 104,198 MT.
May halit man kag kapierdehan sa mais, balinghoy, high-value crops, livestock kag poultry, kag agricultural facilities.
Maga-conduct pa ang agriculture department sang field evaluation kun mag-ayo-ayo na ang panahon kag ang sitwasyon.
Ginsiling man sang ahensya nga may yara ini sang P531.72 million nga balor sang agricultural inputs para ipanagtag sa apektado nga mga mangunguma.
Buligan man sang ahensya ang mga mangunguma paagi sa Quick Response Fund, Survival and Recovery (SURE) Loan Program, kag Philippine Crop Insurance Corporation.
