ILOILO CITY – Nagdangat sa P96.4 million ang halit sa sektor sang agrikultura sa bilog nga Western Visayas kasunod sang pagbubo sang mabaskog nga ulan kag pagbaha bangud sa low pressure area kag intertropical convergence zone.

Sa interview sang Bombo Radyo kay Engr. Albert Barrogo, director sang Department of Agriculture Region 6, iya ginpahayag nga ang tuman nga mga naapektuhan nga lugar sa Western Visayas amo ang San Carlos City kag Cadiz City sa Negros Occidental; Dumalag kag Sigma sa Capiz; kag Dingle kag Zarraga sa Iloilo.

Sa nasambit nga mga lugar, ang Probinsya sang Capiz ang may pinakadako nga pyerde sa diin nagdangat sa P93.7 million; ginasundan sang Iloilo Province nga may P2.1 million kag Negros Occidental nga may masobra P570,000.

Suno kay Barrogo, nagdangat sa 2, 686 ang mga apektado nga manugpangisda kag mangunguma sa rehiyon.

Ang halit naman sa produksyon sa humayan kag mga palaisdaan ang nagadangat sa 5,903.19 metriko tonelada.

Sa subong, ginatun-an pa sang ahensya ang ayuda nga ihatag sa mga apektado nga pumuluyo.