Nakabaton sang Hall of Fame Award bilang Most Business-Friendly Local Government Unit sa Highly Urbanized City Category sang Philippine Chamber of Commerce and Industry (PCCI) ang Iloilo City Government.
Ini matapos napasanyog ang magagmay nga negosyo kag nasiguro nga may patas nga oportunidad ang tanan nga negosyante.
Bangud sini, nangin awardee sang 2023, 2025 kag 2026 ang siyudad sa nasambit nga category.
Ginpahayag ni Mayor Raisa Treñas nga indi lamang para sa Iloilo City Government ang pagkilala kundi para man sa mga negosyante, investors, micro, small and medium enterprises (MSMEs), business organizations kag pribado nga sektor nga nagabulig sa pagpalig-on sang ekonomiya sang siyudad.
Suno kay Treñas, personal niya nga adbokasiya ang pagsiguro nga indi lamang ang dalagko nga investors ang makabenepisyo sa suporta sang gobyerno, kundi pati ang mga tag-iya sang sari-sari store, karinderia, food business, kag iban pa nga micro kag nano enterprises.
“I want to see our small businesses become bigger businesses,” pahayag ni Treñas, nga naghatag-diin sa iya handum nga ang mga nagasugod pa lamang nga negosyo makapatubo sang ila income, makahatag sang trabaho, kag makabulig sa iban pa nga pamilya.
Lakip sa mga inisyatibo nga ginaduso sang administrasyon amo ang Nano Enterprise Incentives Ordinance, institutionalization sang Negosyo Development Academy, Nano Food Truck Ordinance kag mga programa para sa startup development.
Ginpahayag man sang alkalde nga importante nga ang mga programa nga may yara sang klaro nga polisiya, ordinansa, kag pondo agud masiguro nga magapadayon ang suporta sa mga negosyante sa masunod nga tuig.
Dugang pa ni Treñas, ang Hall of Fame recognition indi katapusan sang ila pagpanikasog, kundi dugang nga rason agud pauswagon pa ang serbisyo sang gobyerno kag palig-onon ang partnership sa pribado nga sektor.
Sa idalom sang RISE TO ACTION nga panindugan, ginpahayag sang alkalde nga dapat mabatyagan sang tanan ang pag-uswag sang Iloilo City, ilabi na ang mga magagmay nga negosyante nga nagapangita sang oportunidad agud mapadako ang ila pangabuhian.
Text by: Bombo Cyrene A. Nasis
