HONG KONG – Nagdangat na sa 180 ka tawo ang naaresto sa Hong Kong bangud sa ginapahayag pagpakigbahin nila sa pagpatigayon sang hublag protesta.
Hugot nga ginbantayan sang linibo ka mga kapulisan ang mga dalanon sa Hong kong bilang pagpakita sang ila presensya agud punggan ang mga nagapatigayon sang hublag protesta.
Ini isa ka adlaw antes ang nakatalana nga debate sang mga mamalidha may kaangtanan sa national anthem law nga ginaduso sang China sa nasambit nga rehiyon.
Nahibaluan nga paga istoryahan subong nga adlaw sang mga mamalidha ang national anthem bill sa diin mangin ilegal na ang pagpangyaguta kag pagpangbastos sa kanta nga “March of the Volunteers” nga national anthem sang China.
Ang magalapas sa nasambit nga layi ang posible nga mapreso sang tubtob sa tatlo ka tuig kag pagabaydon sang HK$ 50,000 ukon halos P400,000.
Madumduman nga ginduso ang national anthem bill sang gintalikdan nga Enero 2019 matapos nga ginyaguta sang mga tumalan-aw ang national anthem sang China sa tunga sang international soccer match sang 2015.
