ILOILO CITY – Naglab-ot sa halos 5,000 ang nabaton nga report sang Department of Social Welfare and Development Region VI may kaangtanan sa ginikanan sang mga benepisyaryo sang Pantawid Pamilyang Pilipino Program nga nagaprenda sang cash card.
Sa interview sang Bombo Radyo kay Belen Gebusion, 4Ps Division Chief sang Department of Social Welfare and Development Region VI, iya ginpahayag nga ang kwarta sa amo nga programa ang para sa pag-eskwela kag sa ikaayong lawas sang mga kabataan.
Indi dako ang balor sang kwarta suno kay Gebusion gani, indi dapat nga gastuhon para sa iban nga bagay.
Nagpaandam man ang natungdan nga mahimo gid nga makakas sa listahan sang programa ang benepisyaryo sa tion nga mapamatud-an nga nagprenda sang cash card apisar nga makapila na ka beses nga ginpa-andaman.
Suno pa sa iya, sa proseso sang delisting, kinahanglan gid ang nagaka-igo nga ebidensya kag madugay ang proseso sang documentation.
Nagpanugyan si Gebusion sa mga benepisyaryo nga halungan gid ang programa bangud nga kwarta sang gobyerno ang ginagamit kag madamo pa sang gusto nga maka-avail sang programa.
